బీబీనగర్ వద్ద రైలులో పొగలు, ప్రయాణికుల ఆందోళన
యాదాద్రి భువనగిరి జిల్లా బీబీనగర్ వద్ద ఒక రైలులో పొగలు రావడంతో ప్రయాణికులు భయాందోళనకు గురయ్యారు. సికింద్రాబాద్ నుంచి సిర్పూర్-కాగజ్‌నగర్ వెళ్తున్న రైలులో బ్రేక్ లైనర్లు పట్టుకుని మంటలు వ్యాపించినట్లు గుర్తించారు. పొగలను గమనించిన కో-పైలట్ అప్రమత్తం చేయడంతో డ్రైవర్ వెంటనే రైలును నిలిపివేశారు. ఫైర్ ఇంజిన్ సాయంతో మంటలను అదుపులోకి తీసుకువచ్చారు. పెను ప్రమాదం తప్పడంతో ప్రయాణికులు ఊపిరి పీల్చుకున్నారు. ప్రమాదానికి గల కారణాలపై రైల్వే శాఖ అధికారులు దర్యాప్తు చేస్తున్నారు.