పరిపాలనలో ఏఐ వినియోగించాలని ఖమ్మం కలెక్టర్ సూచన
పరిపాలనలో మెరుగైన ఫలితాల సాధనకు కృత్రిమ మేధ (ఏఐ)ను వినియోగించాలని ఖమ్మం జిల్లా కలెక్టర్ అనుదీప్ దురిశెట్టి అధికారులకు సూచించారు. ఏఐ వినియోగంపై అవగాహన కల్పించేందుకు ఆయన పవర్‌పాయింట్ ప్రజెంటేషన్ ఇచ్చారు. గత ఐదేళ్ల ధాన్యం కొనుగోలు వివరాలు అప్‌లోడ్ చేస్తే, పెండింగ్ ఆర్డర్లు ఎక్కువగా ఉన్న రైస్ మిల్లర్ల జాబితాను ఏఐ సెకన్లలో ఇస్తుందని చెప్పారు. రెండు మూడు గంటల పనిని నిమిషాల్లో పూర్తి చేయవచ్చన్నారు. వచ్చే వారం కనీసం రెండు జిల్లా శాఖలు ఏఐ వినియోగంపై ప్రజెంటేషన్ ఇవ్వాలని ఆదేశించారు. అదనపు కలెక్టర్లు డాక్టర్ పి శ్రీజ, పి శ్రీనివాసరెడ్డి, జడ్పీ సీఈఓ దీక్షా రైనా పాల్గొన్నారు.