కోనసీమలో రన్నింగ్‌లో ఊడిన లారీ టైర్, రెండు బైక్‌లు ధ్వంసం
డాక్టర్ బి.ఆర్. అంబేద్కర్ కోనసీమ జిల్లా రాజోలు మండలం తాటిపాకలో సోమవారం ప్రధాన రహదారిపై ప్రమాదం తప్పింది. తాటిపాక నుంచి మామిడికుదురు వైపు వెళ్తున్న పది టైర్ల పాల లారీ చక్రం రన్నింగ్‌లోనే ఊడిపోయి, రహదారి పక్కన నిలిపి ఉంచిన రెండు ద్విచక్ర వాహనాలను ఢీకొట్టి ధ్వంసం చేసింది. వాహనదారులు, స్థానికులు వెంటనే పక్కకు తప్పుకోవడంతో ప్రాణనష్టం జరగలేదని స్థానికులు తెలిపారు. భారీ వాహనాల ఫిట్‌నెస్ తనిఖీలు క్రమం తప్పకుండా జరపాలని వారు కోరుతున్నారు.