సిద్దిపేట, మెదక్ జిల్లాల్లో రెండు రోడ్డు ప్రమాదాలు.. నలుగురు మృతి
సిద్దిపేట, మెదక్ జిల్లాల్లో సోమవారం జరిగిన రెండు రోడ్డు ప్రమాదాల్లో నలుగురు చనిపోయారు. హుస్నాబాద్‌కు చెందిన బైరి నర్సింహ (35), నద్దునూరి శ్రీకాంత్ (32), నద్దునూరి శ్రీనివాస్ బైక్‌పై హనుమకొండ–సిద్దిపేట ప్రధాన రహదారిపై వెళ్తుండగా, రక్షణ చర్యలు లేకుండా మున్సిపల్ సిబ్బంది రోడ్డుపై నిలిపిన చెత్త ట్రాక్టర్‌ను బైక్ ఢీకొంది. నర్సింహ, శ్రీకాంత్ అక్కడికక్కడే మృతి చెందారు. శ్రీనివాస్‌ను ఆసుపత్రికి తరలించారు. దౌల్తాబాద్‌కు చెందిన మామిండ్ల చంద్రయ్య (55), పోచవ్వ (50) స్కూటీని కాస్లాపూర్ యూటర్న్ వద్ద ఆర్టీసీ బస్సు ఢీకొనడంతో ఇద్దరూ మరణించారు.