ఏడాదిన్నరలోగా భూసర్వే పూర్తి చేస్తాం: మంత్రి పొంగులేటి
రాష్ట్రంలో భూసమస్యల శాశ్వత పరిష్కారానికి చేపట్టిన సర్వేను ఏడాదిన్నరలోగా ప్రతీ గ్రామంలో పూర్తి చేస్తామని, ప్రతీ భూ కమతానికి భూధార్ నంబర్ కేటాయిస్తామని మంత్రి పొంగులేటి శ్రీనివాస్‌రెడ్డి తెలిపారు. ఇన్‌చార్జ్ మంత్రి జూపల్లి కృష్ణారావుతో కలిసి సోమవారం నిర్మల్‌లో ఉమ్మడి ఆదిలాబాద్ జిల్లాల కలెక్టర్లు, అధికారులతో ఆయన సమీక్ష నిర్వహించారు. 125 ఏళ్ల క్రితం భూసర్వే జరిగిందని, ఇప్పటికీ వివాదాలు కొనసాగుతున్నాయని చెప్పారు. సర్వేను పారదర్శకంగా నిర్వహించాలని, గిరిజన ప్రాంతాల్లో రెవెన్యూ, అటవీ శాఖల సమస్యలను సమన్వయంతో పరిష్కరించాలని సూచించారు. అర్హులైన పేదలందరికీ ఇందిరమ్మ ఇళ్లు అందించి తెలంగాణను గుడిసెలు లేని రాష్ట్రంగా తీర్చిదిద్దడమే లక్ష్యమన్నారు.