కరీంనగర్ జిల్లాలో భర్తను హత్య చేసిన భార్య, కుమారుడు
కరీంనగర్ జిల్లా మానకొండూర్ మండలం గట్టుదుద్దెనపల్లిలో సోమవారం అర్ధరాత్రి టప్పా రమేశ్ (42) హత్యకు గురయ్యాడు. మానకొండూర్ సీఐ పి.శ్రీలత వివరాల ప్రకారం, రమేశ్ నిత్యం మద్యం సేవించి కుటుంబ సభ్యులతో గొడవ పడుతూ వేధించేవాడు. సోమవారం రాత్రి కూడా గొడవ జరగడంతో భార్య సుమలత, కొడుకు నిఖిల్ అతడిపై దాడి చేశారు. తీవ్ర గాయాలతో రమేశ్ అక్కడికక్కడే మృతి చెందాడు. అనంతరం ఇద్దరూ పోలీస్‌స్టేషన్‌లో లొంగిపోయారు. రమేశ్‌కు 2006లో సుమలతతో వివాహమైంది, వీరికి ఇద్దరు కూతుళ్లు, ఒక కొడుకు. పోలీసులు పంచనామా నిర్వహించి మృతదేహాన్ని ప్రభుత్వాస్పత్రికి తరలించారు. కేసు నమోదు చేసి దర్యాప్తు చేస్తున్నారు.