రామప్ప ఆలయానికి మైనింగ్ ముప్పు లేదు: సింగరేణి
మైనింగ్ కార్యకలాపాలు రామప్ప ఆలయానికి ముప్పు కలిగిస్తాయన్న వార్తలు అపోహల ఆధారంగా వచ్చినవే, పూర్తిగా అవాస్తవమని సింగరేణి కాలరీస్ కంపెనీ లిమిటెడ్ (ఎస్‌సీసీఎల్) యాజమాన్యం సోమవారం తెలిపింది. ములుగు జిల్లాలో ప్రతిపాదిత వెంకటాపూర్ ఓపెన్‌కాస్ట్ ప్రాజెక్టును సమగ్ర శాస్త్రీయ అధ్యయనం తర్వాతే ముందుకు తీసుకెళ్తామని పేర్కొంది. భారత పురావస్తు సర్వేక్షణ సంస్థ (ఏఎస్ఐ), ఇతర ప్రఖ్యాత సంస్థల నివేదికల ఆధారంగానే తదుపరి చర్యలు ఉంటాయని వివరించింది. యునెస్కో ప్రపంచ వారసత్వ కట్టడమైన రామప్ప ఆలయానికి ఎలాంటి నష్టం కలిగించబోమని, పర్యావరణ అనుకూల, చట్టబద్ధ మైనింగ్ తమ ప్రాధాన్యమని తెలంగాణ ప్రభుత్వ సంస్థ అయిన సింగరేణి స్పష్టం చేసింది.