ఖమ్మంలో 216 మందికి రూ.1.02 కోట్ల చెక్కులు పంపిణీ చేసిన మంత్రి
గడప గడపకు సంక్షేమ, అభివృద్ధి ఫలాలు అందించడమే ప్రజా ప్రభుత్వ ధ్యేయమని రాష్ట్ర మంత్రి పొంగులేటి శ్రీనివాస్‌ రెడ్డి అన్నారు. ఆదివారం ఖమ్మంలోని శ్రీశ్రీ సర్కిల్ వద్ద ఉన్న తన నివాసంలో ఖమ్మం రూరల్, ఏదులాపురం మున్సిపాలిటీ పరిధిలోని 216 మంది లబ్ధిదారులకు రూ.1,02,51,000 విలువైన చెక్కులను ఆయన పంపిణీ చేశారు. ఖమ్మం రూరల్ మండలంలోని 51 మందికి కల్యాణలక్ష్మి చెక్కులు, ఏదులాపురం మున్సిపాలిటీలోని 70 మందికి, ఖమ్మం రూరల్ మండలంలోని 95 మందికి సీఎంఆర్ఎఫ్ చెక్కులు అందించారు. ఆపదలో ఉన్న ప్రతి నిరుపేద కుటుంబానికి ప్రభుత్వం అండగా ఉంటుందని చెప్పారు.