అనకాపల్లిలో రూ.1.35 లక్షల కోట్ల ఉక్కు కర్మాగారానికి శంకుస్థాపన
ఆంధ్రప్రదేశ్ ముఖ్యమంత్రి ఎన్. చంద్రబాబు నాయుడు, కేంద్ర మంత్రులతో కలిసి అనకాపల్లి జిల్లా నక్కపల్లి మండలం రాజయ్యపేటలో ఆర్సెలర్‌మిత్తల్, నిప్పన్ స్టీల్ ఇండియా సమీకృత ఉక్కు కర్మాగారానికి శంకుస్థాపన చేశారు. రూ.1,35,964 కోట్ల పెట్టుబడితో 5,465 ఎకరాల్లో రెండు దశల్లో నిర్మించే ఈ ప్లాంటు వార్షిక ఉత్పత్తి సామర్థ్యం 17.8 మిలియన్ టన్నులు. తొలి దశలో 2,600 ఎకరాల్లో రూ.80,000 కోట్లతో పనులు జరిగి 2029 నాటికి ఉత్పత్తి ప్రారంభం కావచ్చు. రూ.11,198 కోట్లతో కెప్టివ్ పోర్టు కూడా నిర్మిస్తారు. సుమారు లక్ష మందికి ఉపాధి లభిస్తుందని అంచనా.