నౌకాదళ బ్రహ్మోస్ వ్యవస్థల కోసం రూ.661.50 కోట్ల ఒప్పందం
భారత నౌకాదళ యుద్ధనౌకల కోసం బ్రహ్మోస్ ఫైర్ కంట్రోల్ సిస్టమ్స్, లాంచర్ల సరఫరాకు రక్షణ మంత్రిత్వ శాఖ బ్రహ్మోస్ ఏరోస్పేస్ ప్రైవేట్ లిమిటెడ్‌తో రూ.661.50 కోట్ల ఒప్పందం కుదుర్చుకుంది. రక్షణ కార్యదర్శి రాజేష్ కుమార్ సింగ్ సమక్షంలో న్యూఢిల్లీలో ఒప్పందంపై సంతకాలు జరిగాయి. బై (ఇండియన్-ఐడీడీఎం) విభాగం కింద కుదిరిన ఈ ఒప్పందంలో కనీసం 68 శాతం స్వదేశీ కంటెంట్ తప్పనిసరి. ఈ వ్యవస్థలను డిస్ట్రాయర్లు, ఫ్రిగేట్లతో సహా ముందువరుస యుద్ధనౌకల్లో అమర్చనున్నారు. ఎంఎస్‌ఎంఈలతో పాటు దేశీయ సంస్థల భాగస్వామ్యం పెరుగుతుందని, మూడేళ్లలో ఉపాధి కల్పన జరుగుతుందని మంత్రిత్వ శాఖ తెలిపింది.