విద్యార్థుల నుంచి లంచం: గుజరాత్ ఆస్పత్రి సూపరింటెండెంట్ అరెస్టు
గుజరాత్ అవినీతి నిరోధక శాఖ (ఏసీబీ) సోమవారం దాహోద్ జిల్లా దేవగఢ్ బారియాలోని జె ఎస్ చౌహాన్ సివిల్ ఆస్పత్రి వైద్య సూపరింటెండెంట్ (క్లాస్-1) డాక్టర్ రహీం ఇబ్రహీం మెమన్ (59)ను అరెస్టు చేసింది. జిల్లా రెసిడెన్సీ కార్యక్రమం కింద ఆస్పత్రికి నియమించిన ఎనిమిది మంది వైద్య విద్యార్థులకు అనుకూల డ్యూటీలు ఇచ్చి, వేధించబోమని చెప్పి ఒక్కొక్కరి నుంచి రూ.5,000 చొప్పున మొత్తం రూ.40,000 లంచం డిమాండ్ చేశారని ఏసీబీ తెలిపింది. లంచం ఇవ్వడానికి నిరాకరించిన ఒక విద్యార్థి గాంధీనగర్ ఏసీబీని ఆశ్రయించడంతో వ్యవహారం బయటపడింది. ప్రభుత్వ నివాస క్వార్టర్స్‌లో రూ.40,000 తీసుకుంటుండగా పట్టుకున్నారు. దర్యాప్తు కొనసాగుతోంది.