ఇళ్ల మ్యుటేషన్‌కు లంచం: పంచాయతీ కార్యదర్శి, సహాయకుడు అరెస్టు
సిద్దిపేట జిల్లా నారాయణరావుపేట మండలం జక్కాపూర్‌ గ్రామానికి చెందిన ఓ వ్యక్తి రెండిళ్లను తన పేరిట మార్చుకునేందుకు (మ్యుటేషన్‌) పంచాయతీలో దరఖాస్తు చేసుకున్నారు. పని పూర్తి చేయడానికి పంచాయతీ కార్యదర్శి అరుణ తొలుత రూ.20 వేలు లంచం డిమాండ్‌ చేసి, తర్వాత రూ.15 వేలకు ఒప్పందం కుదిరింది. బాధితుడి ఫిర్యాదుతో మంగళవారం ఉదయం 11 గంటలకు పంచాయతీ కార్యాలయంలో సహాయకుడు సంతోష్‌ లంచం తీసుకుంటుండగా అనిశా అధికారులు ఇద్దరినీ పట్టుకుని నగదు స్వాధీనం చేసుకున్నారు. నిందితుల్ని హైదరాబాద్‌ అనిశా ప్రత్యేక కోర్టు ముందు హాజరుపరచనున్నారని మెదక్‌ అనిశా డీఎస్పీ సుదర్శన్‌ తెలిపారు.